श्री आदर्श माविमा NCC विद्यार्थी छनोट कार्यक्रम सम्पन्न
आदर्श संवाददाता
स्याङ्जा — श्री आदर्श माध्यमिक विद्यालयमा राष्ट्रिय क्याडेट कोर (NCC) को लागि विद्यार्थी छनोट प्रक्रिया भव्य रूपमा सम्पन्न भएको छ । कार्यक्रम विद्यालय परिसरमा स्वास्थ्य चौकीका स्वास्थ्यकर्मी तथा नेपाल आर्मीका प्रतिनिधिहरूको उपस्थिति र व्यवस्थापनमा सम्पन्न भएको हो ।
छनोट प्रक्रियामा विद्यार्थीहरूको तौल (weight), उचाइ (height), रक्तचाप (blood pressure), दृष्टि परीक्षण (eye check-up) लगायतका विभिन्न स्वास्थ्य परीक्षणहरू गरिएको थियो । विद्यार्थीहरूको सम्पूर्ण स्वास्थ्य अवस्था परीक्षण गरी योग्य विद्यार्थीहरूको छनोट गरिएको थियो ।
कार्यक्रममा स्वास्थ्यकर्मीहरूले प्रत्येक विद्यार्थीको स्वास्थ्य स्थिति सचेत रूपमा अवलोकन गर्नु भयो । रक्तचाप मापन, आँखाको परीक्षण र अन्य सामान्य स्वास्थ्य परीक्षण गरी विद्यार्थीहरूको NCC कार्यक्रममा सहभागिताका लागि आवश्यक मापदण्ड पुरा भए नभएको मूल्यांकन गरिएको थियो ।
छनोट कार्यक्रममा सहभागी भएका नेपाल आर्मीका अधिकारीहरूले विद्यार्थीहरूलाई अनुशासन, देशभक्ति र सेवा भावको महत्वबारे पनि जानकारी गराएका थिए । कार्यक्रममा विद्यार्थीहरू निकै उत्साहित देखिएका थिए र NCC को हिस्सा बन्ने अवसर पाउँदा खुसी व्यक्त गरेका थिए ।
कार्यक्रम सफल बनाउन स्वास्थ्य चौकीका स्वास्थ्यकर्मी, विद्यालयका शिक्षक-शिक्षिका, नेपाल आर्मीका प्रतिनिधि तथा सम्पूर्ण विद्यार्थीहरूको महत्वपूर्ण भूमिका रहेको थियो ।
श्री आदर्श माविमा N.C.C. को पहिलो प्रवचन कार्यक्रम भव्य रूपमा सम्पन्न
स्याङ्जा, असार ९ – श्री आदर्श माध्यमिक विद्यालय, स्याङ्जामा राष्ट्रिय क्याडेट कोर (N.C.C.) अन्तर्गत पहिलो प्रवचन कार्यक्रम उत्साहजनक रूपमा सम्पन्न गरिएको छ । देशभक्त, अनुशासित र सक्षम नागरिक निर्माण गर्ने लक्ष्यसहित सञ्चालन हुने यस कार्यक्रमको शुभारम्भले विद्यालयमा नयाँ ऊर्जा थपेको छ ।
कार्यक्रमको सभापतित्व विद्यालय व्यवस्थापन समिति (वि.व्य.स) का अध्यक्ष श्री तारा प्रसाद थापाले गर्नुभएको थियो । प्रमुख अतिथि रूपमा वडाध्यक्षज्यूको गरिमामय उपस्थिति रहेको थियो । विशिष्ट अतिथि स्वरूप श्री सिंह सार्दुल गुल्म स्याङ्जाका गुल्मपति सेनानी श्री बल बहादुर आले सहभागी हुनुहुन्थ्यो ।
कार्यक्रमको प्रारम्भमा विद्यालयका प्रधानाध्यापक श्री भीम बहादुर थापाले स्वागत मन्तव्य व्यक्त गर्नुभएको थियो । उहाँले विद्यालयमा एन.सी.सी. कार्यक्रमको सुरुआत हुनु गौरवको विषय भएको बताउँदै यसले विद्यार्थीहरूमा अनुशासन, नेतृत्व क्षमता र राष्ट्रसेवाको भावना विकास गर्ने विश्वास व्यक्त गर्नुभयो ।
कार्यक्रम सञ्चालनको जिम्मेवारी विद्यालयका शिक्षक श्री खिम प्रसाद पाण्डेले कुशलतापूर्वक वहन गर्नुभएको थियो । राष्ट्रगान, एन.सी.सी. गीत तथा सम्मान कार्यक्रमले वातावरणलाई अझ उत्साहपूर्ण बनाएको थियो ।
उक्त कार्यक्रममा वि.व्य.स. सदस्य, शिक्षक अभिभावक संघका प्रतिनिधिहरू, अन्य अभिभावक, स्थानीय सामाजिक अगुवाहरू तथा विद्यालयका विद्यार्थीहरूको उल्लेखनीय उपस्थिति रहेको थियो ।
कार्यक्रमको समापनमा अतिथिहरूले एन.सी.सी. मार्फत युवा पुस्तामा अनुशासन, समर्पण र राष्ट्रप्रेम जगाउने सन्देश दिनुभएको थियो । विद्यालयले आगामी दिनमा एन.सी.सी. कार्यक्रमलाई अझ प्रभावकारी बनाउने प्रतिबद्धता व्यक्त गरेको छ ।
धन्यवाद…………….!